Баянхонгор Говь-Алтай чиглэлийн 260 км автозамыг энэ жилдээ дуусгана

Нэмэгдсэн: 2017-03-22

Монгол Улсын Ерөнхий сайд Ж.Эрдэнэбатын баруун аймгуудад ажиллах албан томилолт өнөөдөр Ховд аймгийн Ховд хотоос эхэллээ. Ерөнхий сайдыг дагалдан яваа хүмүүсийн хамт тус аймагт хүрэлцэн ирэхэд Ховд аймгийн Засаг дарга Д.Галсандондог холбогдох албаны хүмүүсийн хамт угтан авч Ховд хотын төв талбайд цэргийн хүрээний хүндэт харуул угтан авч хүндэтгэл үзүүллээ.

Үүний дараа аймгийн удирдлагууд Ерөнхий сайд Ж.Эрдэнэбат болон дагалдан яваа бусад албаны хүмүүст аймгийнхаа нийгэм эдийн засгийн өнөөгийн байдал болон хийгдэж байгаа бүтээн байгуулалтын ажлуудын талаарх товч мэдээллийг хүргэсэн. Баруун бүсийн тулгуур төв Ховд аймаг 17 сумтай, 83500 хүн амтай. Аймгийн удирдлагууд 2016-2025 он хүртэлх бодлогын баримт бичгийг баталж, бүтээн байгуулалтын ажлынхаа төлөвлөгөөг гаргажээ. Ховд аймгийн нэг онцлог бол ашигт малтмалын нөөцөө харьцангуй бага хөндсөн аймаг. Өнөөдөр Ховд аймгийн Цэцэг сумын Хөшөөтийн нүүрсний уурхай бүрэн хүчин чадлаараа ажиллаж байгаагаас гадна 2-3 жижиг алтны уурхай ажиллаж байгаа. Аймгийн удирдлагуудын зүгээс Засгийн газраас хэрэгжүүлж байгаа Алт-2 хөтөлбөрт хамрагдах хүсэлтэй байгаагаа энэ үеэр хэллээ.

Ерөнхий сайдын энэ удаагийн албан томилолтын үр дүнд Баянхонгор Говь-Алтай чиглэлийн 260 км автозамыг энэ жилдээ дуусгах шийдвэрийг гаргаснаа аймгийн удирдлагуудад дуулгасан.

Ховд аймаг олон үндэстэн ястны өлгий нутаг. Өнөөдөр тус аймагт 13 үндэстэн ястан оршин сууж байгаагаас Ховд сумын нийт иргэдийн 98 хувь нь Казах үндэстэн. 3 дугаар сарын 22 бол хахир хатуу өвөл цагийг өнөтэй давж хаврын урин дулаан улиралтай золгосны баяр буюу Наурызын баяр. 

Ерөнхий сайд Ж.Эрдэнэбат дагалдан яваа хүмүүсийн хамт Ховд сумын ард иргэдийн Наурызын баярт оролцлоо. Энэ үеэрээ Баян-Өлгий аймгийн нийт иргэд болон Монгол орныхоо бүх нутагт амьдран суугаа нийт казах иргэдэд Казах ард түмний үндэсний баярын мэндийг хүргэж, айл өрх бүрт аз жаргал эрүүл энхийг хүсэн мэндчиллээ. Баярын арга хэмжээний үеэр Казах үндэстний баярын арга хэмжээнд Засгийн газрын тэргүүн оролцож байгаад нэн талархалтай хандаж байгаагаа тус сумын иргэд илэрхийлсэн. Мөн өнгөрсөн өвөл 2 удаа хялмаалснаас өөрөөр хураа хайрлаагүй тэнгэр энэ өдрүүдэд хаврын анхны цасыг харамгүй хайрлаж байгааг онцолж хаврын цас шар тос гэж хөдөөгийн ард иргэд билэгшээж байсан юм.

Ховд аймгийн Ховд сумын иргэн А.Шайзаны гэрт Ерөнхий сайд мөн зочилсон. Монгол Улсын Гавьяат эдийн засагч, аймгийн Статистикийн газрын даргаар 33 жил ажилласан ахмад буурай өнөөдөр 5 хүүхдийн хамт сум орондоо энх тунх аж төрж байна.

Санал болгож байна
Төрийн байгууллагуудын мэдээлэл